“ვმუშაობ აუდიო-ვიზუალური ხელოვნების მიმართულებით. განხორცილებული პროექტების ძირითადი მედიუმებია ფოტო და ვიდეო, ნამუშევრების თემები კი სოციალური ნარატივები, რომლებიც თავის მხრივ უკავშირდება ქალაქსა და გარემოს რომელშიც ვცხობრობთ.

2022 წლიდან ვმუშაობ მოკლემეტრაჟიან მხატვრულ ფილმზე ,,ასეთი ხანგრძლივი არყოფნა’’. ფილმი შუახნის მარტოხელა ქალის ცხოვრების ერთ კრიზისულ დღეს ასახავს და ტრაგიკული ამბების შემდეგ საკუთარი თავის ძიებისა და გამორკვევის თემას ეხება. პროექტი ამჟამად პოსტ-პროდუქციის ეტაპზეა და წარმოების ბოლო საფეხურებს გადის.

2021 წელს ვიმუშავე ფოტო-ვიდეო პროექტზე რომელიც ქალთა შრომისა და მიგრაციის კვლევის ერთგვარი ვიზუალიზაცია იყო.
ამავე წელს დავიწყე ფოტო-ვიდეო პროექტი რუსთავში გარემოვაჭრე ქალების სამუშაო/ გარემო პირობების ასახვის მიზნით. აღნიშნული პროექტი დღემდე მიმდინარეობს და ცდილობს დააკვირდეს ცვლილებებს, რომელსაც პერიოდულად სახელმწიფოს მხრიდან მათი შევიწროვება იწვევს.

2020 წელს პანდემიის დაწყებამ და გაურკვეველი მომავლის პერსპექტივამ მიბიძგა დავკვირვებოდი ქალქს, რომელშიც დაბადებიდან ვცხოვრობ თუმცა მასთან კავშირს ვერასოდეს ვგრძნობდი. ,,რატომ დარჩა ყველაფერი ისე როგორც იყო’’ დოკუმენტური ფოტო და ვიდეო პროექტია, სადაც მანამდე შეუმჩნეველი ადგილების შემჩნევით საკუთარი ქალაქისა და იდენტობის შესწავლის მნიშვნელოვანი პერიოდი იწყება.”